Би 40 гаруй жил мал маллахдаа сүүлийн жилүүдэд малын тоо биш чанарт түлхүү анхаарахыг хичээж байна Манайх тэмээ голлон малладаг, 700 гаруй тэмээтэй, бэлчээрийн даац хүрэлцэхгүй болохоор 200-аад бог үлдээгээд бусдыг нь цөөлчихсөн. Бог малын арьс, нэхийг түүхий эдийг ченжүүд хүртэл авахаа байсан болохоор хөгшин маань жилд 20-30-ыг элдэж, хүн амьтанд үстэй дээл, ханцуйвч хийж өгдөг. Манай эцэг эх малчин хүмүүс байсан. Манайх гурван хүүхэдтэй айл, гурвуулаа малчин. Эртэч байж, залхуугүй хөдөлмөрлөөд л амьдарвал амьдрал аяндаа болдог юм. Би одоо 68 хүрч байна, зүгээр сууж ер чадахгүй.

 

Бэлчээрийн даац хэтэрсэн, бэлчээр муудсан энэ цагт малчид маань малынхаа тоо толгойг чухалчлахгүй эрүүл мэнд, чанарт л анхаармаар байгаа юм. Үр ашгаа өгдөггүй олон малтай байхаар ашиг шим

сайтай цөөн малтай байвал малчид бидэнд ч амар. Малаа чанаржуулахын тулд туулга, тарилга, угаалгад сайн хамруулна. Шүлхий, бруцеллёз өвчнөөс сэргийлэх вакцин, шир хорхойноос хамгаалах угаалгаа товлолт хугацаанд тогтмол хийлгэнэ. Сэрүү унахаас өмнө малынхаа ч тэр, өрхийнхөө ч тэр бэлтгэлээ сайтар базаавал айхтар зуд, гамшиг тохиохгүй л бол бусдаар хөдөөний амьдрал амар амгалан сайхан шүү дээ.